ဒီနေ့ မတ်လ ၁၇ ရက်မှာ ကမ္ဘာ့အပူဆုံး ၁၅ မြို့စာရင်းထဲမှာ မြန်မာနိုင်ငံက ချောက်မြို့နဲ့ မကွေးမြို့တို့ ပါဝင်လာပြီး ချောက်မြို့ဟာ ကမ္ဘာ့အပူချိန်အမြင့်ဆုံး ဒုတိယနေရာမှာ ရှိနေတယ်လို့ မိုးလေဝသနဲ့ ရာသီဥတုဆိုင်ရာသတင်းတွေကို ထုတ်ပြန်ပေးနေတဲ့ အယ်ဒိုရာဒို (eldorado) ဝဘ်ဆိုက်ထံမှ သိရပါတယ်။

ချောက်မြို့ရဲ့ အမြင့်ဆုံးအပူချိန်ဟာ ၄၄ ဒသမ ၃ ဒီဂရီ ဆဲလ်စီးယပ် အထိရှိနေပြီး မကွေးမြို့အပူချိန်ဟာ ၄၃ ဒသမ ၂ ဒီဂရီ ဆဲလ်စီးယပ် အထိရှိမြင့်တက်လာကာ ဒီနေ့မှာ ကမ္ဘာ့အပူဆုံး မြို့စာရင်းရဲ့ အဆင့် ၁၃ အထိ ရောက်ရှိလာတယ်လို့ သိရပါတယ်။

“Meteoblue ရဲ့ forecast မှာ ၂၂ ရက်နေ့နောက်ပိုင်း အပူချိန်တွေ ပြန်ကျနိုင်ကြောင်းတွေ့ရပါတယ်။ လောလောဆယ် အပူချိန်မြင့်တက်နေချိန်ဖြစ်တာကြောင့် ကချင်ပြည်နယ်နဲ့ တနင်္သာရီတိုင်းတွေမှအပ ဘယ်ပြည်နယ်တိုင်းမှာမှ မိုးရွာနိုင်မှာ မဟုတ်ပါဘူး”လို့ မိုးလေဝသပညာရှင် ဝင်းနိုင်ထံက သူ့ရဲ့ လူမှုကွန်ယက်မှာ ရေးသားဖော်ပြထားပါတယ်။

နေ့အပူချိန်တွေက နေပြည်တော်၊ မန္တလေးနဲ့ မကွေးတိုင်းမှာ မတ်လရဲ့ ပျမ်းမျှအပူချိန် တို့ထက် ၃ ဒီဂရီဆဲလ်စီးယပ် ပိုနေခဲ့တယ်လို့ စစ်ကောင်စီရဲ့ မိုးဇလဌာနက မတ်လ ၁၅ ရက်မှာ ထုတ်ပြန်ထားပါတယ်။

ရန်ကုန်၊ ပဲခူး၊ စစ်ကိုင်း၊ တနင်္သာရီ၊ ကယား(ကရင်နီ)၊ ကရင်၊ ချင်း၊ မွန်နဲ့ ရှမ်းပြည်နယ်မှာ မတ်လရဲ့ ပျမ်းမျှအပူချိန်တို့ထက် ၂ ဒီဂရီဆဲလ်စီးယပ် ပိုခဲ့ပြီး၊ ကချင်ပြည်မှာ တွင် မတ်လရဲ့ ပျမ်းမျှအပူချိန်အောက် ၄ ဒီဂရီဆဲလ်စီးယပ် လျော့နည်းခဲ့ကာ၊ ကျန်တိုင်းနဲ့ ပြည်နယ်တို့မှာ မတ်လရဲ့ ပျမ်းမျှအပူချိန် ခန့်သာ ရှိတယ်လို့ သိရပါတယ်။

မတ်လ ၁၅ ရက် ဖြစ်ပေါ်ခဲ့တဲ့ ထူးခြားတဲ့ နေ့အပူချိန်တွေမှာ ချောက်မြို့မှာ ၄၃.၃ ဒီဂရီဆဲလ်စီးယပ်၊ မကွေးမြို့မှာ ၄၂.၈ ဒီဂရီဆဲလ်စီးယပ်၊ ပြည်မြို့မှာ ၄၁.၈ ဒီဂရီဆဲလ်စီးယပ်၊ အောင်လံမြို့မှာ ၄၁.၇ ဒီဂရီဆဲလ်စီးယပ်၊ မြင်းမူမြို့မှာ ၄၁.၂ ဒီဂရီဆဲလ်စီးယပ်၊ ကျောက်ဆည်(လွန်ကျော်)၊ မင်းဘူးမြို့၊ တောင်တွင်းကြီးမြို့နှင့် ဆင်ဖြူကျွန်းမြို့တို့မှာ ၄၁.၀ ဒီဂရီဆဲလ်စီးယပ်စီ၊ ညောင်ဦးမြို့မှာ ၄၀.၆ ဒီဂရီ ဆဲလ်စီးယပ်၊ မန္တလေးမြို့မှာ ၄၀.၅ ဒီဂရီဆဲလ်စီးယပ်နဲ့ မြဝတီမြို့မှာ ၄၀.၃ ဒီဂရီဆဲလ်စီးယပ်အထိ အပူချိန်တွေ ရှိနေခဲ့တယ်လို့ သိရပါတယ်။

ဓါတ်ပုံ – ရေနံ့သာဒင်းဂါး ညီနောင်များ