ဒီနေ့ မတ်လ ၂၈ ရက် မြန်မာနိုင်ငံအလယ်ပိုင်း မန္တလေးမြို့ရဲ့ အရှေ့မြောက်ဘက် ၂၀ ကီလိုမီတာခန့်အကွာကို ဗဟိုပြု လှုပ်ခတ်သွားတဲ့ ရစ်တာစကေး ၇.၇ အဆင့်ရှိတဲ့ အင်အားအလွန်ပြင်းထန်တဲ့ မြေငလျင်ကြောင့် နေပြည်တော်အပါအဝင် တိုင်းနဲ့ ပြည်နယ် ၆ ခုကို အရေးပေါ်အခြေအနေအဖြစ် စစ်ကောင်စီက ကြေညာလိုက်ပါတယ်။

အင်အား ရစ်ခ်တာစကေး ၇.၇ အဆင့်တဲ့ အင်အားအလွန်ပြင်းထန်တဲ့ မြေငလျင်အပြင် နောက်ဆက်တွဲ ငလျင် ၃ ခု လှုပ်ခတ်ခဲ့တာကြောင့် ထိခိုက်ဒဏ်ရာရရှိမှု၊ သေဆုံးမှု၊ အခြေခံအဆောက်အအုံအပျက်အစီးများပြားတဲ့ ဒေသတွေကို စစ်ကောင်စီလက်အောက်ခံ အမျိုးသားသဘာဝ ဘေးအန္တရာယ် စီမံခန့်ခွဲမှု ကော်မတီက ကြေညာလိုက်တာပါ။

စစ်ကိုင်း၊ မန္တလေး၊ မကွေး၊ ပဲခူး၊ ရှမ်းပြည်နယ်အရှေ့မြောက်ဒေသနဲ့ နေပြည်တော် ကောင်စီနယ်မြေတို့ကို အရေးပေါ် အခြေအနေအဖြစ် သတ်မှတ်လိုက်တယ်လို့ ဆိုထားပါတယ်။

အဲဒီဒေသတွေက ပျက်စီးဆုံးရှုံးမှုများကို အလျင်အမြန် စုံစမ်းစစ်ဆေးခြင်း၊ ကူညီကယ်ဆယ်ရေး လုပ်ငန်းတွေ ဆောလျင်စွာ လုပ်ဆောင်သွားမယ်လို့ ဆိုထားသလို သဘာဝဘေးအန္တရာယ် ကူညီကယ်ဆယ်ရေးနဲ့ လူသားချင်း စာနာမှု အကူအညီတွေ ရရှိရေး ဆောင်ရွက်သွားမယ်လို့ စစ်ကောင်စီက ကြေညာပါတယ်။

မန္တလေး၊ စစ်ကိုင်းနဲ့ နေပြည်တော်မြို့တွေက ဆေးရုံးတွေမှာလည်း ငလျင်ဒဏ်ကြောင့် ထိခိုက်ဒဏ်ရာရ လူနာတွေ အများအပြား ရောက်ရှိလာတယ်လို့ စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက သတင်းဌာနတချို့က ဖြေကြားထားပါတယ်။

အင်အားအလွန်ပြင်းထန်တဲ့ ငလျင်ကြောင့် စစ်ကိုင်း၊ မန္တလေး၊ နေပြည်တော်၊ တောင်ကြီး၊ ပဲခူးတို့မှာ လူသေဆုံးမှုတွေနဲ့ ထိခိုက်ပျက်ဆီးမှုတွေ ရှိနေတယ်လို့ အမျိုးသားညီညွတ်ရေးအစိုးရက ကနေဦး သတင်းထုတ်ပြန်ပါတယ်။

ပြည်သူလူထုအနေနဲ့ ဖြစ်ပေါ်လာနိုင်တဲ့ ကောလဟလတွေအပေါ် သတိထား ဆင်ခြင်ကြဖို့ လိုအပ်ပြီး သတင်းအချက်အလက်တွေကို ယုံကြည်စိတ်ချရတဲ့ သတင်းအရင်းအမြစ်တွေကနေ စီစစ်အတည်ပြုကာ လက်ခံကြဖို့လည်း သတိပေးနှိုးဆော်ထားပါတယ်။