ကရင်ပြည်နယ်၊ ဇွဲကပင်တောင်တန်းပေါ်မှာ တောပန်းထိမ်ငိုပန်းမျိုးစိတ်အသစ် ၁ မျိုးကို ပထမဆုံးအကြိမ် မှတ်တမ်းတင် တွေ့ရှိခဲ့ပြီး ဇွဲကပင်ပန်းတိမ်ငိုလို့ နာမည်အသစ် ပေးထားတယ်လို့ သိရပါတယ်။

ဇွဲကပင်ပန်းတိမ်ငို ပန်းမျိုးစိတ်သစ်ဟာ ကမ္ဘာမှာ မြန်မာနိုင်ငံမှာပဲ တွေ့နိုင်ပြီး မြန်မာနိုင်ငံမှာလည်း ဇွဲကပင်တောင်ထိပ်ပေါ်က ၄ နေရာခန့်မှာသာ တွေ့နိုင်တယ်လို့ Native Species Conservation and Identification အဖွဲ့ဝင် တချို့ ပြုစုတဲ့ စာတမ်းအရ သိရပါတယ်။

တောပန်းထိမ်ငိုပန်း အများစုက အနိမ့်ပိုင်းတွေမှာ ပေါက်ကြပေမယ့် ဇွဲကပင်ပန်းထိမ်ငိုပန်းဟာ ထုံးကျောက်တောင်ထိပ်ပိုင်း ပင်လယ်ရေ မျက်နှာပြင်အမြင့် မီတာ ၇၀၀ (၂၂၉၆ ပေ)ခန့်က ထုံးကျောက်သားတွေကြားမှာ တိုးဝင်ပေါက်ရောက်နေကြတယ်လို့ သိရပါတယ်။

မိုးဆိုဝေ၊ နွေဆိုခွေပျောက်နေတတ်တဲ့ ဇွဲကပင်ပန်းတိမ်ငို ပန်းမျိုးစိတ်သစ်ဟာ လူတွေကို ရာသီဥတုနဲ့ ပတ်သက်လို့ သတိပေးတတ်တဲ့ ထူးခြားချက်တွေလည်း တွေ့ရှိရတယ်လို့ သိရပါတယ်။

“နွေဆို သူတို့ရဲ့တိုတိုတုတ်တုတ် အမြစ်ရောင် လက်ချောင်းဥလေးတွေက ကျောက်တွေကြားမှာ ခိုကပ်ပြီး မိုးတွင်းတုန်းက တစ်နှစ်စာအတွက် စုဆောင်းထားတဲ့ ရေနဲ့ အစာကို အသုံးပြုပြီး အပူဒဏ်ခံကာရှင်သန်ဖို့ ချွေတာရှင်သန်နေကြပါတယ်။ နွေအချိန်မှာ အပူလွန်ကဲလို့ ကျောက်တွေပူလွန်းရင် အပင်တွေက ရေတွေ အငွေ့ပျံ ဆုံးရှုံးတတ်ပါတယ်။ မိုးစကျတဲ့ အချိန်အပင်တွေ သန်ပြီးကြီးလာရင်တော့ မိုးကောင်းမယ်။အပင်ကျုံလီနေရင်တော့ အရမ်းပူခဲ့တယ် ရေရှားတယ်ဆိုတာကို သိနိုင်ပါတယ်” လို့ NSCI အဖွဲ့က ဆိုပါတယ်။

တကမ္ဘာလုံးမှာ ပန်းထိမ်ငိုပန်း မျိုးစိတ်ပေါင်းက ၁၄၀ မျိုးရှိပြီး မြန်မာနိုင်ငံမှာ အားလုံးစုစုပေါင်းရဲ့ ၅ ပုံ၁ပုံ အရေအတွက်ရှိတယ်လို့ သိရပါတယ်။

မြန်မာနိုင်ငံမှာ ဇွဲကပင် ပန်းထိမ်ငိုပန်းမျိုးစိတ်သစ်အပါအဝင် မျိုးစိတ် ၂၈ မျိုး ရှိတယ်လို့ သိရပါတယ်။

ဇွဲကပင် ပန်းထိမ်းငိုပန်းမျိုးစိတ်သစ် စာတမ်းဖြစ်တဲ့ “A NEW SPECIES OF GLOBBA UNDER SECT. HAPLANTHERA (ZINGIBERACEAE) FROM MYANMAR” ကို MYO MIN LATT, MIN KHANT NAING, RITESH KUMAR CHOUDHARY AND JOONGKU LEE တို့က ပြုစုခဲ့တာဖြစ်ပါတယ်။

စာတမ်းအပြည့်အစုံကို ဖတ်ရှုချင်သူတွေအနေနဲ့ Native Species Conservation and Identification – NSCI ရဲ့ လူမှုကွန်ယက်စာမျက်နှာမှာ သွားရောက်တောင်းယူနိုင်တယ်လို့ သိရပါတယ်။