MN
ကချင်ပြည်နယ်၊ ဖားကန့်မြို့နယ် စပေါ့ရွာက ကျောက်စိမ်းတွင်းဟောင်း နွံကန်ပေါက်ကျမှုမှာ သေဆုံးသူ ရုပ်အလောင်း ၃၀ ကျော်အထိ ရှာဖွေတွေ့ရှိခဲ့သလို ရှာဖွေကယ်ဆယ်ရေးတွေကို ရပ်နားလိုက်ပြီလို့ ဒေသခံတချို့က ပြောပါတယ်။
ဆိပ်မူကျေးရွာအုပ်စု စပေါ့ရွာအနီးက ကျောက်စိမ်းတွင်းဟောင်းလည်းဖြစ်တဲ့ စွန့်ပစ်မြေစာပုံ ရွှံ့နွံကန် ပြိုကျမှုမှာ ဇန်နဝါရီလ ၁၅ ရက် ညနေပိုင်းအထိ သေဆုံးသူရုပ်အလောင်း ၃၂ ဦးအထိ ရှာဖွေတွေ့ရှိခဲ့တယ်လို့ ကူညီကယ်ဆယ်ရေး လုပ်နေသူတွေက ပြောပါတယ်။
“ရှာဖွေ ကယ်ဆယ်ရေး ပြီးဆုံးလို့ မနေ့က ညနေမှာ ရပ်နားလိုက်ကြတာပါ။ ကျန်ရှိ စာရင်းပေးထားတဲ့ ရုပ်အလောင်းတွေလဲ မတွေ့ရှိရတော့ဘူး။ ပျောက်တဲ့ လူတွေလည်း ရှိတယ်”လို့ ကူညီကယ်ဆယ်ရေးမှာ ပါဝင်လုပ်ကိုင်နေသူ ဒေသခံတဦးက ပြောပါတယ်။
ရွှံနွံကန်ပြိုကျမှုဖြစ်စဉ်မှာ အသက် ၂ နှစ်အရွယ် ကလေးငယ်ကနေ သက်ကြီးပိုင်းအထိ အရွယ်စုံ သေဆုံးမှုတွေ ဖြစ်ပွားခဲ့ပြီး စပေါ့ရွာက နေအိမ် ၆၀ ဝန်းကျင်ဟာ နစ်မြှုပ်၊ ပျက်စီးသွားတာဖြစ်တယ်လို့ ဒေသခံတွေက ပြောပါတယ်။
အဲဒီဖြစ်စဉ်ဟာ ဇန်နဝါရီလ ၁၃ ရက် နံနက်ပိုင်း ၁ နာရီဝန်းကျင်မှာ ဒေသခံပြည်သူတွေ အိပ်စက်အနားယူချိန်မှာ ပြိုကျမှုဖြစ်ပွားခဲ့တာပါ။
ဖားကန့်ဒေသက ကျောက်စိမ်းတူးဖော်မှုတွေမှာ မြေစာပုံနဲ့ နွံကန်ပြိုကျမှု ဖြစ်ရပ်တွေ မကြာခဏဖြစ်လာနေသလို လူသေဆုံးမှုတွေလည်း တိုးလာနေတယ်လို့ ဒေသခံတွေက ပြောပါတယ်။
ဓါတ်ပုံ – မှော်မင်းသား
