ဧရာဝတီတိုင်းဒေသကြီး၊ ဝါးခယ်မမြို့နယ်၊ ကျုံကပြင်ကျေးရွာအုပ်စုထဲက ကျုံကပြင်- တက်ဆိပ် ဒေသခံ သားငှက်ထိန်းသိမ်းရေး ဧရိယာ – KTCG ထဲ ဇန်နဝါရီလအတွက် လစဉ်ငှက်စာရင်းကောက်ယူတာမှာ ငှက်မျိုးစိတ်ပေါင်း ၇၀ ကျော် တွေ့ရှိတယ်လို့ သိရပါတယ်။

ငှက်မျိုးစိတ်စာရင်းကောက်ယူရာမှာ အဓိက တွေ့ရှိရတဲ့ ငှက်တွေက ရေငှက်နဲ့ ကုန်းငှက်တွေ ဖြစ်တယ်လို့ တက်ဆိပ် ဒေသခံ သားငှက်ထိန်းသိမ်းရေး ဧရိယာ – KTCG က အသိပေးထုတ်ပြန်ထားပါတယ်။

လစဉ်ငှက်စာရင်းကောက်ယူခြင်း လုပ်ငန်းတွေကို တလကို ၄ ကြိမ် ပြုလုပ်ပြီး ဒုတိယအကြိမ် ငှက်စာရင်းကောက်ယူးခြင်းကို ဇန်နဝါရီလ ၁၆ ရက်က ပြုလုပ်တယ်လို့ ဆိုပါတယ်။

ကမ္ဘာ့ရှားပါး ငှက်မျိုးစိတ်လည်း ဖြစ်သလို မျိုးသုဉ်းလုနီးပါး အန္တရာယ်ရှိတဲ့ မျိုးစိတ် – CR ဖြစ်တဲ့ စာဝါကျားငှက်တွေကို ဧရာဝတီတိုင်းထဲက ကျုံကပြင်- တက်ဆိပ် ဒေသခံ သားငှက်ထိန်းသိမ်းရေး ဧရိယာအတွင်း အကောင်ရေ ရာချီတွေ့ရှိရပြီး အကောင်ရေတိုးပွားလာနေတယ်လို့ KTCG အဖွဲ့က ပြီးခဲ့တဲ့ ၂၀၂၄ ခုနှစ်က ထုတ်ပြန်ထားပါတယ်။

ကမ္ဘာ့ရှားပါး စာဝါကျားငှက်မျိုးစိတ်တွေနဲ့ အခြား ဇီဝမျိုးစုံမျိုးကွဲတွေကို လေ့လာရင်း အပန်းဖြေနိုင်ဖို့ ကျုံကပြင်-တက်ဆိပ် ဒေသခံသားငှက်ထိန်းသိမ်းရေး နယ်မြေသို့ လာရောက်လည်ပတ်ကြဖို့လည်း KTCG အဖွဲ့က ဖိတ်ခေါ်ထားပါတယ်။