ချင်းပြည်နယ်၊ ZZLMS ထိန်းချုပ်နယ်မြေတွေက မြစ်ချောင်းတွေမှာ ငါးရစ်တက်ကာလ နည်းလမ်းစုံနဲ့ ငါးဖမ်းခြင်း မပြုလုပ်ကြဖို့ ZZLMS ညီနောင်အဖွဲ့က မနေ့က သတိပေးထုတ်ပြန်လိုက်ပါတယ်။

အောက်တိုဘာလ ၈ ရက်ကနေ နိုဝင်ဘာလ ၂၀ ရက်အထိ ဒိုင်နမို၊ မိုင်း၊ ဆေးခတ်ခြင်းစတဲ့ နည်းလမ်းအမျိုးမျိုးနဲ့ ငါးဖမ်းခြင်းတွေ မပြုလုပ်ကြဖို့ သား၊ ငါး၊ သတ္တဝါတွေကို ထိန်းသိမ်းဆိုင်ရာ ထုတ်ပြန်ချက်နဲ့ သတိပေးထုတ်ပြန်တာပါ။

သတိပေးချက်တွေကို မလိုက်နာဘဲ ကျူးလွန်သူတွေ ရှိရင် သက်ဆိုင်ရာ အဖွဲ့က ဥပဒေ၊ အမိန့်ညွန်ကြားချက် စည်းမျဉ်းတွေနဲ့ အရေးယူမယ်လို့ ဆိုပါတယ်။

ဇူလိုင်လ ၂၃ ရက်က ကျင်းပပြုလုပ်တဲ့ ZZLMS ညီနောင်အဖွဲ့ရဲ့ ၆ ကြိမ်မြောက် အစည်းအဝေး ဆုံးဖြတ်ချက်အရ ဖော်ဆောင်တာလို့လည်း သိရပါတယ်။

ZZLMS ညီနောင်အဖွဲ့ဟာ ချင်းကာကွယ်ရေးတပ်ဖွဲ့တွေဖြစ်တဲ့ CDF – Zotung, CDF- Zophei ၊ CDF – Lautu ၊ CDF – Mara ၊ CDF – Senthang တို့ဖြစ်ပါတယ်။

CDF – ထန်တလန်အဖွဲ့ဟာလည်း ငါးရစ်တက်ချိန်ဖြစ်တဲ့ အောက်တိုဘာလ ၅ ရက်ကနေ နိုဝင်ဘာလ ၃၀ ရက်အထိ အများပြည်သူတွေ ငါးဖမ်းခြင်း မပြုလုပ်ဖို့ သတိပေး တားမြစ်ထားပါတယ်။

မင်းတပ်မြို့နယ်မှာလည်း မြေပေါ်မြေအောက် သစ်တောထွက်ပစ္စည်းတွေ ရှာဖွေခြင်း၊ ရောင်းဝယ်ဖောက်ကားခြင်းကို တားမြစ်ထားပြီး လိုက်နာမှုမရှိရင်း ဥပဒေအရဖြစ်စေ၊ စီမံခန့်ခွဲရေး နည်းလမ်းအရဖြစ်စေ အရေးယူသွားမယ်လို့ စက်တင်ဘာလ ၁၈ ရက်က မင်းတပ် ပအဖက ထုတ်ပြန်ထားပါတယ်။

ဓါတ်ပုံများ – CJ