MN
ရခိုင်ပြည်နယ်မြောက်ပိုင်းနဲ့ ချင်းပြည်နယ်တောင်းပိုင်းတို့မှာ ဒီကနေ့ ၂၄ နာရီအတွင်း မိုးသည်းထန်စွာ ရွာသွန်းနိုင်ပြီး ရေကြီးရေလျံမှုနဲ့ မြေပြိုမှု စတဲ့ သဘာဝဘေးအန္တရာယ်တွေကို သတိထားကြဖို့ မိုးဇလပညာတွေက သတိပေးနေပါတယ်။
စက်တင်ဘာလ ၁၃ ရက် နနံက်ပိုင်းမှ စတင်လို့ ၂၄ နာရီအတွင်း ပလက်ဝမြို့နယ်မှာ မိုးကြီးရေလျှံနိုင်တယ်လို့ Meteorological Centre မှ မိုးဇလကျွမ်းကျင်သူ စုစုစံက ဒီကနေ့ မနက်ပိုင်းမှာ ပြောဆိုထားပါတယ်။
ရာဂီ မုန်တိုင်းအရှိန်ကြောင့် လာမယ့် ၂၄ နာရီအတွင်း ရခိုင်ပြည်နယ်မြောက်ပိုင်းနဲ့ ချင်းပြည်နယ်တောင်ပိုင်းမှာ မိုးရေချိန် ၁၆၅ မီလီမီတာ (၆.၅ လက်မခန့်)နဲ့ မိုးသည်းထန်စွာ ရွာသွန်းနိုင်တယ်လို့လည်း မိုးဇလကျွမ်းကျင်သူ ဦးဝင်းနိုင်က ပြောပါတယ်။
“ဒီလေဖိအားနည်းရပ်ဝန်းဖြစ်ပေါ်လာတဲ့အရှိန်ကြောင့် ဒီနေ့နံနက် ၁၀ နာရီမှ စက်တင်ဘာ ၁၄ ရက် နံနက် ၁၀ နာရီအထိ – ၂၄ နာရီအတွင်း ရခိုင်ပြည်နယ်မြောက်ပိုင်း၊ ချင်းပြည်နယ်တောင်ပိုင်း၊ စစ်ကိုင်းတိုင် အထက်ပိုင်း ဒေသ တချိုတွေမှာ သာ မိုးများနိုင်ပါမယ်။ ၂၄ နာရီအတွင်း မိုးရေချိန် ၁၆၅ မီလီမီတာ(၆.၅ လက်မခန့်)ရွာသွန်းနိုင်ပါမယ်” လို့ ဦးဝင်းနိုင်က ပြောပါတယ်။
၂၄ နာရီအတွင်း မိုးရေချိန် ၃၀ မီလီမီတာအထက် ရွာနေပါက မိုးများတယ်လို့ သတ်မှတ်နိုင်တဲ့အတွက် ရခိုင်ပြည်နယ် မြောက်ပိုင်း နဲ့ ချင်းတောင်ပိုင်းက ပြည်သူတွေအနေနဲ့ စိုးရိမ်စရာအခြေအနေတွေ ရှိနေသေးတယ်လို့ သိရပါတယ်။
ရခိုင်ပြည်နယ်မြောက်ပိုင်းနဲ့ ချင်တောင်ပိုင်းမှာ မြစ်ချောင်း ရေတွေ တက်လာနိုင်ပြီး တောင်ပြိုခြင်း၊ မြေပြိုခြင်းတွေ ဖြစ်လာနိုင်တယ်လို့ မိုးဇလကျွမ်းကျင်သူတွေက ပြောပါတယ်။
ရခိုင်၊ ချင်း၊ မန္တလေးနဲ့ မကွေးတိုင်းတွေမှာ နေရာကွက်ပြီး မိုးကြီးနိုင်ကြောင်း၊ ရွာရန် ရာနှုန်းပြည့် ဖြစ်ပါကြောင်း၊ လာမယ့် ၂ ရက်မှာလည်း ချင်းနဲ့ ရခိုင်မှာ မိုးဆက်လက်ပိုနေမယ်လို့ စစ်ကောင်စီ မိုးဇလဌာနကလည်း ဒီကနေ့မှာ ထုတ်ပြန်ထားပါတယ်။
မိုးသည်းထန်စွာ ရွာသွန်းလို့ နိုင်ငံတစ်ဝန်း ရေကြီးရေလျှံမှုနဲ့ မြေပြိုမှုတွေဖြစ်နေတာကြောင့် ဒီနေ့ စက်တင်ဘာလ ၁၃ ရက်အထိ သေဆုံးသူ ၆၀ ဝန်းကျင်ရှိနေပြီး သေဆုံးသူ အရေအတွက်တွေ တိုးလားနေတယ်လို့ သိရပါတယ်။
စစ်ကောင်စီရုံးစိုက်ရာ နေပြည်တော်အပါအဝင် မြန်မာနိုင်ငံတဝန်း မြို့ ၁၀ ခုထက်မနည်းမှာ ရေကြီး ရေနစ်မြုပ်မှုတွေ ဖြစ်ပေါ်နေပြီး ပြည်သူ သောင်းချီဟာ ရေဘေးဒုက္ခကို ခံစားနေရသလို အရေးပေါ် အကူအညီတွေ လိုအပ်နေပါတယ်။
