တိုင်ဖွန်းမုန်တိုင်း “ကဂျိကိ” (KAJIKI)အရှိန်ကြောင့် ဒီနေ့ ဩဂုတ်လ ၂၆ ရက်မှ ၂၉ ရက်အတွင်း နိုင်ငံတဝန်းမှာ မိုးထစ်ချုန်းရွာနိုင်ပြီး ဒေသတချို့မှာ နေရာကွက်လို့ မိုးကြီးနိုင်တယ်လို့ စစ်ကော်မရှင်ရဲ့ မိုးဇလဌာနက သတိပေးထုတ်ပြန်ပါတယ်။

ဒီနေ့နံနက် ၅ နာရီခွဲအချိန် တိုင်းထွာချက်တွေအရ မနေ့က ဗီယက်နမ်နိုင်ငံ ကုန်းတွင်းပိုင်းဒေသတွေကို ဖြတ်ကျော်ခဲ့တဲ့ တိုင်ဖွန်းမုန်တိုင်း “ကဂျိကိ” (KAJIKI)ဟာ အနောက်ဘက်သို့ ရွေ့လျားခဲ့ပြီး၊ လာအိုနိုင်ငံအထက်ပိုင်းဒေသတွေမှာ အပူပိုင်းမုန်တိုင်း “ကဂျိကိ” အဖြစ်သို့ အားလျော့သွားခဲ့တယ်လို့ ဆိုပါတယ်။

အပူပိုင်းမုန်တိုင်း “ကဂျိကိ” ရဲ့ အရှိန်ကြောင့် ဒီနေ့ နံနက်မှ ဩဂုတ်လ ၂၉ ရက်အထိ တိုင်းနဲ့ပြည်နယ်အားလုံးမှာ နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ အချို့ဒေသတွေမှာ ဒေသအလိုက်နဲ့ နေရာကွက်လို မိုးကြီးနိုင်တယ်လို့ မိုးဇလဌာနက ထုတ်ပြန်ပါတယ်။

လာအိုနိုင်ငံကို ရောက်လာပြီဖြစ်တဲ့ တိုင်ဖွန်း KAJIKI ဟာ လေဖိအားနည်းရပ်ဝန်းအဆင့်အထိ လျော့ကျသွားပြီး နောက် ၂၄ နာရီအတွင်းမှာ လေပွေလှိုင်းအဆင့်လောက်သာကျန်ပါတော့မယ်လို့ မိုးလေဝသစောင့်ကြည့်လေ့လာသူ ဦးဝင်းနိုင်က အသိပေး ပြောဆိုပါတယ်။

“ မုန်တိုင်းအကြွင်းအကျန်များက မြန်မာနိုင်ငံအရှေ့ဘက်မှ ရှမ်းပြည်နယ်-အရှေ့ပိုင်းနှင့် တောင်ပိုင်းဒေသတွေကို ဖြတ်သန်းပြီး မန္တလေးတိုင်း၊ စစ်ကိုင်းတိုင်းနဲ့ ကချင်ပြည်နယ်တွေအထိ ဆက်လက်ရွေ့လျားဝင်ရောက်နိုင်တာ တွေ့ရပါတယ်။လာအိုနဲ့ ထိုင်းနိုင်ငံမြောက်ပိုင်းမှာ ပါလာတဲ့ မိုးရေတော်တော်များများရွာခဲ့ပြီးဖြစ်တာကြောင့် မြန်မာနိုင်ငံအတွင်းမှာ မူလကြိုတင်ခန့်မှန်းချက်များလောက် မိုးရေချိန်မများနိုင်တော့ပါဘူး၊၊ ၂၄ နာရီအတွင်း မိုးရေချိန် အများဆုံး ၃ လက်မ နဲ့ ၅ လက်မအောက်သာရွာနိုင်မှာဖြစ်ကြောင်း တွေ့ရပါတယ်။ နေရာကွက်ပြီး တောင်ကြောတွေပေါ်မှာ မိုးသည်းထန်နိုင်တာကိုတော့ တောင်ကျရေကျဆင်းနိုင်တာ၊ ရုတ်ခြည်းရေကြီးနိုင်တာတွေရှိတဲ့အတွက် သတိထားကြရပါမယ်” လို့ ဦးဝင်းနိုင်က အသိပေးထားပါတယ်။

မြန်မာ့ကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင်တို့မှာ ရံဖန်ရံခါ မိုးသက်လေပြင်းတွေ ကျရောက်ပြီး လှိုင်းကြီးနိုင်သလို မိုးသက်လေပြင်းကျစဉ် ရေပြင်/ မြေပြင်လေဟာ တစ်နာရီကို ၃၅ မိုင်အထိ တိုက်ခတ်နိုင်ကြောင်း၊လှိုင်းအမြင့်မှာ မြန်မာ့ပင်လယ်ကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင်တို့မှာ ၁၀ ပေမှ ၁၂ ပေခန့် ရှိနိုင်တယ်လို့ ဆိုပါတယ်။

အပူပိုင်းမုန်တိုင်း “ကဂျိကိ” ဟာ အနောက်ဘက်သို့ ဆက်လက်ရွေ့လျားနိုင်ပြီး၊ နောက် ၆ နာရီအတွင်း လာအိုနိုင်ငံကုန်းတွင်းပိုင်းဒေသတွေမှာ အပူပိုင်းမုန်တိုင်းငယ်နဲ့ နောက် ၁၂ နာရီအတွင်း ထိုင်းနိုင်ငံမြောက်ပိုင်းဒေသတွေမှာ လေဖိအားနည်းဆဲလ်အဖြစ်ကို အသီးသီးအားလျော့သွားနိုင်တယ်လို့ ခန့်မှန်းထားပါတယ်။

အပူပိုင်းမုန်တိုင်း “ကဂျိကိ” ရဲ့ အရှိန်ကြောင့် မိုးသည်းထန်စွာရွာသွန်းခြင်းနဲ့အတူ လေပြင်းတိုက်ခတ်ခြင်း၊ ရုတ်တရက်ရေကြီးခြင်းနဲ မြေပြိုခြင်းစတဲ့ သဘာဝဘေးအန္တရာယ်တွေ ဖြစ်ပေါ်နိုင်တဲ့အတွက် ကုန်းမြင့်ဒေသအနီးမှ နေထိုင်ကြသူတွေ မြေပြိုမှုအန္တရာယ်နဲ့ မြစ်ငယ်၊ ချောင်းငယ်များအနီးမှာ နေထိုင်ကြသူတွေ ရေကြီး၊ ရေလျှံမှုတွေကို ကြိုတင်သတိပြုနေထိုင်ဖို့ နှိုးဆော်ထားပါတယ်။

ဒါ့အပြင် ပြည်တွင်းလေကြောင်းပျံသန်းရေး၊ မြန်မာ့ကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင် တို့ရှိ ကမ်းနီး၊ ကမ်းဝေးငါးဖမ်းရေယာဉ်တွေ၊‌ သင်္ဘောများအနေနဲ့လည်း ကြိုတင်သတိပြုနိုင်ဖို့ အသိပေး ထုတ်ပြန်နေပါတယ်။