ဧပြီလ ပထမ ၁၀ ရက်ပတ်အတွင်း ငလျင်လှုပ်ခတ်မှု အဓိက ဒေသတွေဖြစ်တဲ့ နေပြည်တော်၊ မန္တလေး၊ စစ်ကိုင်းအပါအဝင် တိုင်းနဲ့ပြည်နယ်အများစုမှာ ရွာသွန်းမြဲခန့် မိုးထစ်ချုန်း ရွာနိုင်တယ်လို့ စစ်ကောင်စီရဲ့ မိုးဇလဌာနက ဧပြီလ ၁ ရက်မှာ ကြေညာပါတယ်။

မိုးရွာသွန်းမှု အခြေအနေဟာ ရန်ကုန်၊ ဧရာဝတီ၊ တနင်္သာရီ၊ ကချင်၊ ကရင်၊ မွန်တို့မှာ ရွာသွန်းမြဲထက် ပိုနိုင်ပြီး နေပြည်တော်၊ မန္တလေး၊ ပဲခူး၊ စစ်ကိုင်း၊ မကွေး၊ ကယား (ကရင်နီ) ၊ ချင်း၊ ရခိုင်၊ ရှမ်းတို့မှာ ရွာသွန်းမြဲခန့် မိုးထစ်ချုန်း ရွာနိုင်တယ်လို့ သတိပေးထုတ်ပြန်ထားပါတယ်။

ရန်ကုန်၊ ဧရာဝတီ၊ တင်္သာရီ၊ ကချင်၊ ကယား (ကရင်နီ)၊ ကရင်၊ မွန်နဲ့ ရှမ်း (မြောက်ပိုင်း၊ အရှေ့ပိုင်း)တို့မှာ ၄ ရက်မှ ၈ ရက်ခန့် မိုးထစ်ချုန်း ရွာနိုင်ပြီး နေပြည်တော်၊ မန္တလေး၊ ပဲခူး၊ မကွေး၊ စစ်ကိုင်း၊ ချင်း၊ ရခိုင်နဲ့ ရှမ်း (တောင်ပိုင်း)တို့မှာ ၁ ရက်မှ ၃ ရက်ခန့် မိုးထစ်ချုန်းရွာနိုင်တယ်လို့ ဆိုပါတယ်။

ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ လေဖိအားနည်း ရပ်ဝန်း ၁ ကြိမ် ဖြစ်ပေါ်နိုင်ပြီး ၊ မုန်တိုင်းငယ်အဖြစ်သို့ ပိုမိုအားကောင်းလာနိုင်တယ်လို့ သိရပါတယ်။

ဒါ့အပြင် ဧပြီလနဲ့ မေလတွေမှာ နေ့အပူချိန်တွေ တဖြည်းဖြည်းမြင့်တက်လာရာမှ အပူပျံတက်တိမ်းတွေ ဖြစ်ထွန်းပြီး မွန်းလွဲ၊ ညနေပိုင်းတို့မှာ မိုးတိမ်တောင်တွေ ဖြစ်ပေါ်နိုင်ပြီး အဲဒီမိုးတိမ်တောင်တွေ ရွေ့လျားရာ တလျှောက် လေပြင်းတွေ တိုက်ခတ်ခြင်း၊ လေပြင်းနဲ့အတူ ထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်းနဲ့ နေရာကွက်ကျား မိုးထစ်ချုန်းရွာခြင်းတို့ ဖြစ်ပေါ်နိုင်တယ်လို့ မိုးဇလဌာနက ဆိုပါတယ်။

ဧပြီလပထမပတ်အတွင်း ဘင်္ဂလားပင်လယ်အော်မှာ လေဖိအားနည်းရပ်ဝန်းကြောင့် မိုးရွာသွန်းနိုင်တဲ့အတွက် နေအိမ်ပျက်စီးသွားတဲ့ ငလျင်ဘေးသင့်ပြည်သူတွေအနေနဲ့ ယာယီနေထိုင်ဖို့ နေရာတွေ အခက်အခဲပိုမိုကြုံတွေ့ရနိုင်တယ်လို့ အမျိုးသားညီညွတ်ရေးအစိုးရကလည်း မတ်လ ၃၁ ရက်က သတိပေးထုတ်ပြန်ပါတယ်။

ဧပြီလနဲ့ မေလတွေမှာ ဖြစ်ပေါ်လာနိုင်တဲ့ မိုးလေဝသနဲ့ ပတ်သက်လို့ အထူးဂရုပြု နေထိုင်သွားကြဖို့ အသိပေးနှိုးဆော်နေပါတယ်။

မတ်လ ၂၈ ရက်က စစ်ကိုင်းအနီး ဗဟိုပြုလို့ ရစ်ချ်တာစကေး ၇.၇ ငလျင်ကြောင့် ဧပြီလ ၁ ရက်နံနက် ၈ နာရီအထိ စာရင်းအရ နိုင်ငံတဝန်း သေဆုံးသူ ၂၇၀၀ ကျော်၊ ထိခိုက်ဒဏ်ရာရ ၄၅၀၀ ကျော်၊ ပျောက်ဆုံးသူ ၄၄၀ကျော် ရှိတယ်လို့ စစ်ကောင်စီက ထုတ်ပြန်ပါတယ်။

မတ်လ ၂၈ ရက်နေ ဧပြီလ ၂ ရက်အထိ နောက်ဆက်တွဲငလျင်အကြိမ်ပေါင်း ၅၇ ကြိမ်အထိ လှုပ်ခတ်နေပြီး ထပ်မံ၍လည်း လှုပ်ခတ်နိုင်ချေရှိနေတယ်လို့ သိရပါတယ်။