မြန်မာနိုင်ငံတဝန်းနဲ့ ထိုင်းနိုင်ငံမြောက်ပိုင်းဒေသတို့မှာ ဖေဖော်ဝါရီလ၂၃ ရက်မှ ၂၇ ရက်အတွင်း အချိန်အခါမဟုတ် မိုးထစ်ချုန်း ရွာနိုင်ပြီး လေပြင်းတိုက်ခတ်ခြင်းနဲ့ မိုးသီးကြွေခြင်းတွေ ဖြစ်နိုင်တယ်လို့ မိုးဇလဌာနနဲ့ မိုးလေဝသကျွမ်းကျင်သူတွေထံမှ သိရပါတယ်။

ဖေဖော်ဝါရီလ ၂၄ ရက်မှ ၂၇ ရက်အထိ နေပြည်တော်၊ ရန်ကုန်၊ ပဲခူး၊ ဧရာဝတီ၊ တနင်္သာရီ၊ ကချင်၊ ကရင်နီ (ကယား)၊ ကရင်၊ မွန်နဲ့ ရှမ်း စတဲ့ တိုင်းနဲ့ပြည်နယ်တို့မှာ နေရာကျဲကျဲမှ နေရာစိပ်စိပ် မိုးရွာနိုင်ပြီး မန္တလေး၊ စစ်ကိုင်းတိုင်း အထက်ပိုင်း၊ ချင်းနဲ့ ရခိုင်တို့မှာ နေရာကွက်ကျား မိုးထစ်ချုန်းရွာနိုင်တယ်လို့ စစ်ကောင်စီ လက်အောက်ခံ မိုးဇလဌာနက မနေ့က အသိပေးထုတ်ပြန်ပါတယ်။

ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှ လေနွေးများနဲ့ တရုတ်ပြည်မကြီးပေါ်ရှိ လေဖိအားကြီးရပ်ဝန်းဒေသမှ ရွေ့လျားလာတဲ့ လေအေးများတွေ့ဆုံမှု ၊ အနောက်ဘက်မှ ရွေ့လျားလာတဲ့ လေပွေလှိုင်းတွေရဲ့ အရှိန်ကြောင့်နဲ့ အရှေ့ဘက်မှ ရွေ့လျားလာတဲ့ လေပွေလှိုင်းတွေ အရှိန်ကြောင့် အချိန်အခါမဟုတ် မိုးရွာနိုင်ခြင်းဖြစ်တယ်လို့ ဆိုထားပါတယ်။

“မြန်မာပြည်ဘက်က လေဖိအားချိုင့်ဝှမ်း(trough)က အနောက်ဘက်မှ ထိုင်းနိုင်ငံမြောက်ပိုင်းကို ဖြတ်မယ်လို့ ဖေါ်ပြထားတာကြောင့် မြန်မာပြည်ဘက်အခြမ်းမှာလဲ အဲ့ဒီရက်(ဖေဖေါ်ဝါရီ ၂၃-၂၅ အတွင်း)လေပြင်းတိုက်တာ(တနာရီ မိုင် ၂၀ ခန့်)တိုက်နိုင်မယ်၊ မိုးရွာတာတော့ နည်းပါမယ်။ သတိထားရမှာက ခြောက်သွေ့-စိုက်ဆင်းလေပြင်း(လေနီကြမ်း)တိုက်နိုင်တာကြောင့် မိုးတိမ်တောင်များတက်လာတာကို သတိထားရပါမယ်” လို့ မိုးလေဝသပညာရှင် ဦးဝင်းနိုင်က သူ့ရဲ့လူမူကွန်ယက်မှာ သတိပေးရေးသားထားပါတယ်။

ထိုင်းနိုင်ငံမြောက်ပိုင်းဒေသတွေမှာတော့ ဖေဖော်ဝါရီလ ၂၃ ရက်မှ ၂၅ ရက်အတွင်း မိုးထစ်ချုန်း ရွာနိုင်ပြီး လေးပြင်တိုက်ခတ်မှုနဲ့ မိုးသီးကြွေခြင်းတွေ ဖြစ်ပေါ်နိုင်တယ်လို့ ထိုင်းမိုးလေဝသဌာနက ဖေဖော်ဝါရီလ ၂၀ ရက်က ထုတ်ပြန်ပါတယ်။

ပြည်သူတွေအနေနဲ့ အချိန်အခါမဟုတ်မိုးရွာခြင်းနဲ့အတူ မိုးထစ်ချုန်းခြင်း၊ မိုးကြိုး ပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း ၊ သစ်ပင်နဲ့ ကြော်ငြာ ဆိုင်းဘုတ်တွေ လဲကျခြင်း စတဲ့အရာတွေကို ကြိုတင် သတိပြုနိုင်ဖို့ အကြံပြုထားပါတယ်။