ချင်းပြည်နယ်မြောက်ပိုင်း၊ ထန်တလန်မြို့နယ်၊ ဘွာလ်တောင်ကြော၊ ဗောမ်ကွာကျေးရွာမှာ ဒေသခံပြည်သူတချို့ရဲ့ အိမ်မွေးတိရိစ္ဆာန်တွေကို ဝံပုလွေအုပ်တွေက မကြာခဏ ရောက်လာ၊ တိုက်ခိုက်နေတယ်လို့ သိရပါတယ်။

ဇန်နဝါရီလထဲမှာ ဗောမ်ကွာ (Vomkua) ကျေးရွာက ဒေသခံတွေရဲ့ ကျွဲ၊ နွား နဲ့ ဝက်တွေကို ဝံပုလွေအုပ်တွေက တပတ်အတွင်း နှစ်ကြိမ် လာရောက်တိုက်ခိုက်တာကြောင့် အိမ်မွေးတိရစ္ဆာန် ၁၀ ကောင်ကျော် ဆုံးရှုံးသွားတယ်လို့ ချင်းပြည်ရဲ့ သတင်းဌာနဖြစ်တဲ့ Zalen ကလည်း ဖော်ပြပါတယ်။

ဝံပုလွေအုပ်တွေက အိမ်မွေးတိရိစ္ဆာန်တွေကို ထပ်မံတိုက်ခိုက်လာမှာကို ဒေသခံရွာသားတွေ စိုးရိမ်းနေကြပြီး တချို့အိမ်မွေးတိရစ္ဆာန်တွေကို တောထဲက ပြန်လည်ထိန်းသိမ်းထားဖို့ ပြင်ဆင်နေကြတယ်လို့ သိရပါတယ်။

ဘွာလ်တောင်ကြောပေါ်မှာ ဝံပုလွေအုပ်တွေက ရပ်ရွာအနီးထိ ရောက်လာပြီး အိမ်မွေးတိရစ္ဆာန်တွေကို သတ်ဖြတ်စားသောက်လာမှုနဲ့ ပတ်သက်လို့ ဘာကြောင့်ဖြစ်ပွားလာရတယ်ဆိုတာကို အသေးစိတ်သိနိုင်ဖို့ ဒေသခံတွေနဲ့ ဆက်သွယ်မေးမြန်းဆဲဖြစ်ပါတယ်။

ဓါတ်ပုံ – Zalen