တအာင်းတပ် PSLF/ TNLA ထိန်းချုပ်ထားတဲ့ နမ္မတူနဲ့ နမ့်ဖက်ကာ မြို့နယ်ထဲမှာ မိုးအဆက်မပြတ် ရွာသွန်းပြီး ရေကြီးရေလျှံမှု ဖြစ်ပွားတဲ့အတွက် စိုက်ပျိုးထားတဲ့ လယ်ယာဧက အများအပြား ထိခိုက်ပျက်စီးနေတယ်လို့ သိရပါတယ်။
နိုဝင်ဘာလ ၁ ရက်မှ ၇ ရက်အထိ မိုးအဆက်မပြတ် ရွာသွန်းပြီး ရေကြီးရေလျှံမှုကြောင့် တအာင်းပြည်၊ နမ္မတူခရိုင်၊ နမ္မတူမြို့နယ်၊ မိုင်းတက်ကျေးရွာရှိ လယ်ယာ ၄၆ ဧက ထိခိုက်ပျက်စီးဆုံးရှံးတယ်လို့ တအာင်းတပ် PSLF/ TNLA သတင်းနဲ့ ပြန်ကြားရေးဌာနက ဒီနေ့ နိုဝင်ဘာလ ၁၀ ရက်မှာ ထုတ်ပြန်ပါတယ်။
ဒေသခံလူဦးရေ ၂၆ ဦးရဲ့ စိုက်ပျိုးသီးနှံတွေ ဖြစ်တဲ့ စပါးခင်း ၁၂ ဧက၊ ပြောင်း ၂၂ ဧက၊ ပဲ ၁၁ ဧက၊ နေကြာ ၂ ဧက တို့ ရေနစ်မြုပ် ပျက်စီးခြင်းဖြစ်တယ်လို့ ဆိုပါတယ်။
ဒါ့အပြင် နမ္မတူမြို့နယ်၊ မိုင်စိန်ကျေးရွာရှိ ဒေသခံပြည်သူတွေက စိုက်ပျိုးထားတဲ့ လယ်ယာဧကပေါင်း ၂၁ ဧက ခွဲလည်း နိုဝင်ဘာလအတွင်း ရာသီဥတုဘေးဒဏ်ကြောင့် ရေနစ်မြုပ်သွားတဲ့အတွက် ပဲသီးနှံတွေ ပျက်စီးသွားတယ်လို့ ဆိုပါတယ်။
ကွက်ခိုင်ခရိုင်၊ နမ့်ဖက်ကာမြို့နယ်ရှိ ဟိုမောရေချောင်တစ်လျှောက်မှာ ရေကြီးရေလျှံမှုတွေ ဖြစ်ပွားတဲ့အတွက် ဒေသခံပြည်သူတွေ ရိတ်သိမ်းထားတဲ့ လယ်စပါးဧက ၂၄ ဧက ထက်မနက် ပျက်စီးဆုံးရှုံးတယ်လို့ သိရပါတယ်။
နိုဝင်ဘာလအတွင်း မိုးအဆက်မပြတ် ရွာသွန်းမှုကြောင့် တအာင်းတပ်ထိန်းချုပ်ဒေသရှိ နမ္မတူမြို့၊ မန်တုံမြို့၊ နမ့်ဖက်ကာမြို့နဲ့ မိုင်းဝီးမြို့နယ်တို့မှာ ရေကြီးရေလျှံမှု ဖြစ်ပွားရာ စိုက်ပျိုးသီးနှံတွေ ပျက်စီးဆုံးရှုံးသကဲ့သို့ ကျေးရွာတချို့မှာ ရေဘေးသင့်နေသလို မြေပြိုမှုလည်း ဖြစ်ပွားတယ်လို့ သိရပါတယ်။
အခု ရက်ပိုင်းမှာ မိုးများနိုင်တဲ့အတွက် ရေကြီးရေလျှံမှုနဲ့ မြေပြိုမှု အန္တရာယ်တွေကို ကြိုတင်ကာကွယ်နိုင်ဖို့အတွက် ဒေသခံပြည်သူတွေအနေနဲ့ မြေပြိုနိုင်တဲ့ နေရာနဲ့ ရေကြီးရေလျှံနိုင်တဲ့ နေရာတွေကို ရှောင်ရှားနေထိုကြဖို့ PSLF/ TNLA ၊ သတင်းနဲ့ ပြန်ကြားရေးဌာနက အသိပေးထားပါတယ်။
