တိုင်ဖွန်းမုန်တိုင်း “ခန့်မေဂီ” ကြောင့် နိုင်ငံတဝန်းက ဒေသအများစုမှာ ၃ ရက်ကြာ မိုးထစ်ချုန်းရွာနိုင်ပြီး နေရာကွက်လို့ မိုးကြီးခြင်း ဖြစ်ပေါ်နိုင်တယ်လို့ မိုးဇလဌာနက ကြေညာပါတယ်၊၊
တောင်တရုတ်ပင်လယ်ပြင်မှာ ဖြစ်ပေါ်နေတဲ့ တိုင်းဖွန်းမုန်တိုင်း “ခန့်မေဂီ” (KALMAEGI) ဟာ အနောက်- အနောက်မြောက်ဘက်ကို ရွေ့လျားနေပြီး နိုဝင်ဘာလ ၆ ရက် ညပိုင်းမှာ ဗီယက်နမ်နိုင်ငံ ကမ်းခြေကို ဒါနန်းမြို့ တောင်ဘက်မှ ဖြတ်ကျော်နိုင်တယ်လို့ မိုးဇလဌာနက ဒီနေ့ နိုဝင်ဘာလ ၆ ရက်မှာ ထုတ်ပြန်ပါတယ်။
ဒါနန်းမြို့ရဲ့ အရှေ့- အရှေ့တောင်ဘက် ရေမိုင် ၃၀၀ မိုင်ခန့်အကွာ ပင်လယ်ပြင်မှာ လက်ရှိမှာ ဗဟိုပြုနေတဲ့ တိုင်ဖွန်းမုန်တိုင်း “ခန့်မေဂီ”ဟာ ဗဟိုချက် လေဖိအား ၉၅၅ ဟက်တိုပါစကယ်နဲ့ အမြင့်ဆုံးလေတိုက်နှုန်း တစ်နာရီမှာ ၈၅ မိုင်နှုန်းခန့်ဖြစ်တယ်လို့ သိရပါတယ်။
အဆိုပါ တိုင်ဖွန်းမုန်တိုင်းက ပြတ်ထွက်လာတဲ့ တိမ်တိုက်တွေကြောင့် နိုင်ဝင်ဘာလ ၈ ရက်မှ ၁၀ ရက်အထိ နေပြည်တော်၊ ရန်ကုန်၊ ပဲခူး၊ ဧရာဝတီ၊ တနင်္သာရီ၊ ကရင်နီ၊ ကရင်၊ မွန်၊ ရခိုင်နဲ့ ရှမ်း (တောင်ပိုင်းနဲ့ အရှေ့ပိုင်း) တို့မှာ နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး အချို့ ဒေသတွေမှာ ဒေသအလိုက်နဲ့ နေရာကွက်လို့ မိုးကြီးခြင်းတွေ ဖြစ်ပေါ်နိုင်တယ်လို့ မိုးဇလဌာနထံမှ သိရပါတယ်။
မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နဲ့ ကမ်းလွန် ပင်လယ်ပြင်တို့မှာ တစ်ခါတစ်ရံ မိုးသက်လေပြင်းတွေ ကျရောက်ပြီး လှိုင်းအသင့်အတင့်မှ လှိုင်းကြီးနိုင်ကြောင်း၊ မိုးသက်လေပြင်းကျစဉ် ရေပြင်/မြေပြင်လေဟာ တစ်နာရီကို ၂၅ မိုင်မှ မိုင် ၃၀ အထိ တိုက်ခတ်နိုင်ကြောင်း သိရပါတယ်။
လှိုင်းအမြင့်မှာ မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင်တို့မှာ ၇ ပေမှ ၉ ပေခန့်ရှိနိုင်တယ်လို့ ဆိုပါတယ်။
ဒီနေ့ နိုဝင်ဘာလ ၆ ရက်မှာ မကွေးနဲ့ ရခိုင်တို့မှာ နေရာကွက်ကျား၊ မန္တလေး၊ စစ်ကိုင်း၊ ဧရာဝတီ နဲ့ ချင်းတို့မှာ နေရာကျဲကျဲ၊ နေပြည်တော်၊ ရန်ကုန်၊ ပဲခူး၊ စစ်ကိုင်းတိုင်းအထက်ပိုင်း၊ ကချင်၊ ကရင်နီနဲ့ ရှမ်း တို့မှာ နေရာစိပ်စိပ်နဲ့ ကျန်တိုင်းနဲ့ ပြည်နယ်တို့မှာ နေရာအနှံ့ အပြား မိုးထစ်ချုန်းရွာနိုင်သလို ရွာရန်ရာနှုန်းပြည့် ဖြစ်တယ်လို့ ဆိုပါတယ်။
မိုးသည်းထန်စွာရွာသွန်းခြင်းနဲ့ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်းနှင့် မြေပြိုခြင်းစတဲ့ သဘာဝဘေးအန္တရာယ်တွေ ဖြစ်ပေါ်နိုင်သလို အဆိုပါဒေသတွေရှိ ကုန်းမြင့်ဒေသအနီးမှာ နေထိုင် ကြသူတွေအနေနဲ့ မြေပြိုမှုအန္တရာယ်၊ မြစ်ငယ်၊ ချောင်းငယ်တွေအနီးမှာ နေထိုင်ကြသူတွေအနေနဲ့ ရေကြီး၊ ရေလျှံမှုတွေကို ကြိုတင်သတိပြုရှောင်ရှားနိုင်ဖို့ သတိပေးနှိုးဆော်ပါတယ်။
ပြည်တွင်းရေကြောင်းသွားလာရေး၊ လေကြောင်းပျံသန်းရေးနဲံ ဆည်မြောင်းတာတမံတွေအနေနဲ့ လိုအပ်တဲ့ ကြိုတင်ပြင်ဆင်ဆောင်ရွက် ထားနိုင်ဖို့ကိုလည်း သတိပေးထားပါတယ်။
