သန်လျင်ရေနံချက်စက်ရုံ နဲ့ သံပုရာကန် ရေနံချက်စက်ရုံတို့ကနေ တစ်နှစ်ကို ရေနံစိမ်းတန်ချိန် ငါးသန်းအထိ ချက်လုပ်နိုင်ဖို့ စီစဉ်ဆောင်ရွက်နေတယ်လို့ အာဏာသိမ်းစစ်ကော်မရှင်ရဲ့ စွမ်းအင်ဝန်ကြီးဌာနက မနေ့ ဇန်နဝါရီလ ၂၁ ရက်က ထုတ်ပြန်ပါတယ်။
သန်လျင်ရေနံချက် စက်ရုံစီမံကိန်းအတွင်း စက်ရုံသစ် တည်ဆောက်နေပြီး သတ်မှတ်အချိန်ကာလထဲ ပြီးစီးရေး ဆောင်ရွက်နေတယ်လို့ ဆိုပါတယ်။
လက်ရှိဆောင်ရွက်နေတဲ့ စီမံကိန်းတွေ ပြီးစီးပါက စီမံကိန်း အပိုင်း ၂ ကို တစ်နှစ်မှာ ရေနံစိမ်း တန်ချိန် ၃ သန်း ချက်လုပ်နိုင်တဲ့ ရေနံချက်စက်ရုံအဖြစ် သန်လျင်ရေနံချက်စက်ရုံတွေ စီမံကိန်းကို ၂၀၂၈ ခုနှစ်အတွင်း အပြီးတည်ဆောက်သွားနိုင်ဖို့ အစီအမံတွေ ချမှတ်ဆောင်ရွက်နေတယ်လို့ ဆိုပါတယ်။
သန်လျင်ရေနံချက်စက်ရုံးစီမံကိန်းထဲမှာ ရေနံချက်လုပ်ရာကနေ ဘေးထွက်ပစ္စည်းအဖြစ် ထွက်ရှိလာမယ့် ကာဗွန်ဒိုင် အောက်ဆိုဒ်တွေကို ဖမ်းယူပြီး ရေခဲခြောက် (Dry Ice) တွေ ထုတ်လုပ်နိုင်ဖို့လည်း စီမံ ဆောင်ရွက်နေတယ်လို့ ဆိုပါတယ်။
သန်လျင်ရေနံချက်စက်ရုံ စီမံကိန်းအပိုင်း ၁ အဖြစ် တစ်နှစ်မှာ ရေနံစိမ်းတန်ချိန် ငါးသိန်း ချက်လုပ်နိုင်ရေး အကောင်အထည်ဖော်ထားတယ်လို့ သိရပါတယ်။
အလားတူ ရေနံစိမ်းတန်ချိန် ၂ သန်း ချက်လုပ်နိုင်မယ့် သံပုရာကန် ရေနံချက်စက်ရုံ စီမံကိန်းနဲ့ တိုးချဲ့ရေးကိုလည်း တရုတ်နိုင်ငံပိုင် စွမ်းအင်ကုမ္ပဏီနဲ့ ပူးပေါင်းအကောင်အထည်ဖော် ဆောင်ရွက်နေပြီး လိုအပ်တဲ့ ရေနံစိမ်းတွေကို တရုတ်- မြန်မာ ရေနံစိမ်းပိုက်လိုင်းကနေ ရယူဆောင်ရွက်မယ်လို့ သိရပါတယ်။
အဲဒီစီမံကိန်းတွေ ပြီးစီးပါက ပြည်တွင်းစက်မောင်းဆီ လိုအပ်ချက်ကို ဖူလုံစွာ ဖြည့်ဆည်းပေးနိုင်မယ်လို့ အာဏာသိမ်းစစ်ကောင်စီရဲ့ စွမ်းအင်ဝန်ကြီး ဦးကိုကိုလွင်က မနေ့က ပြောပါတယ်။
သံပုရာကန်ရေနံချက်စက်ရုံဟာ မကွေးတိုင်း၊ အထက်မင်းလှမြို့နယ်ထဲမှာ တည်ရှိပြီး လက်ရှိမှာ အဆိုပါ ရေနံချက် စက်ရုံစီမံကိန်းကနေ ရေနံစိမ်း တစ်နှစ်ကို တန်ချိန် ၂ သန်း ချက်လုပ်နိုင်ရေးအတွက် တရုတ်ကုမ္ပဏီ Sino-pipeline International (SPI) နဲ့ စစ်ကော်မရှင်တို့ ပူးပေါင်းဆောင်ရွက်နေခြင်းဖြစ်ပါတယ်။
သံပုရာကန် ရေနံချက်စက်ရုံဟာ ပြည်တွင်း ရေနံချက်စက်ရုံတွေအနက် အဓိကစက်ရုံတစ်ခု ဖြစ်ပြီး လေယာဉ်ဆီ၊ ဓာတ်ဆီ၊ မီးထိုးဆီ၊ ရေနံမီးသွေးနဲ့ ရေနံဓာတ်ငွေ့ရည်တို့ကို ထုတ်လုပ်ပေးတယ်လို့ သိရပါတယ်။
