ရခိုင်မှာ မြောက်ဦးဘုရင်ခေတ်က ရှေးဟောင်းရတနာတွေနဲ့ ငွေဒင်္ဂါး၁၅၀ ကျော် တွေ့ရှိ

ရခိုင်ပြည်နယ်၊ မြောက်ဦးမြို့မှာ ရခိုင်ဘုရင်လက်ထက်က ရှေးဟောင်းရတနာ ပစ္စည်းတချို့နဲ့ ငွေဒင်္ဂါး ၁၅၀ ကျော် တွေ့ရှိတယ်လို့ ရခိုင်ဒေသတွင်း သတင်းဌာနတချို့က ရေးသားပါတယ်။

ဇန်နဝါရီလ ၂၄ ရက် ညနေ ၅ နာရီခန့်မှာ မြောက်ဦးမြို့က ကလေးငယ်တွေ ဘောလုံးကစားနေရာမှာ မြောက်ဦးခေတ် ရခိုင်ဘုရင်လက်ထက်မှာ သုံးစွဲခဲ့တဲ့ ရှေးဟောင်းပစ္စည်းတွေနဲ့ ငွေဒင်္ဂါးတွေကို တွေ့ရှိခြင်းဖြစ်တယ်လို့ Arakan Bay News က ရေးသားပါတယ်။

အချင်း ၁ လက်မခန့်ရှိတဲ့ ကျောက်စိမ်း ၁ တုံး၊ ရွှေပုရပိုက် ၁ ခု၊ ရွှေလက်စွပ် ၃ ကွင်း၊ ရွှေအပိုင်းအစငယ်တွေနဲ့ ရခိုင်ဘုရားတွေအနက်မှ စန္ဒသုဓမ္မရာဇာနဲ့ နရပတိကြီး နာမည်ပါ ငွေဒင်္ဂါး ၁၅၀ ကျော်တို့ကို တွေ့ရှိခြင်းဖြစ်ပါတယ်။

အဆိုပါပစ္စည်းတွေကို ၇ တန်းကျောင်းသား မောင်ဖြိုးမြတ်ဦးနဲ့ ၅ တန်းကျောင်းသား မောင်စိုးအောင်မင်းတို့က တွေ့ရှိခဲ့ခြင်းဖြစ်ပြီး လက်ရှိမှာ ၎င်းရှေးဟောင်းပစ္စည်းတွေ တွေ့ရှိတဲ့ နေရာကို ULA/ AA၊ အာရက္ခပြည်သူ့ တော်လှန်ရေးအစိုးရရဲ့ ရဲတပ်ဖွဲ့ (DLEPS) ဝင်တွေက လုံခြုံရေးယူကာ စောင့်ကြပ်နေတယ်လို့ သိရပါတယ်။