ဗြိတိန်အစိုးရရဲ့ မြန်မာအပေါ် ဒဏ်ခတ်ပိတ်ဆို့မှုတွေကို ချိုးဖောက်မှု ပြုလုပ်နေတဲ့ ဗြိတိသျှပင်လယ်ရပ်ခြား ပိုင်နယ်ထဲက စစ်ကော်မရှင်တပ်နဲ့ ဆက်စပ်နေတဲ့ ရေနံနဲ့ သဘာဝဓါတ်ငွေ စွမ်းအင်ကုမ္ပဏီတွေကို အရေးဆောင်ရွက်ရေးအတွက် Justic For Myanmar (JFM) က တောင်းဆိုလိုက်ပါတယ်။
စစ်အုပ်စုက ထိန်းချုပ်ထားတဲ့ မြန်မာ့ရေနံနဲ့ သဘာဝဓါတ်ငွေ့လုပ်ငန်း (MOGE) နဲ့ ထိုင်းစွမ်းအင်ကုမ္ပဏီ PTT Exploration and Production Public Company Limited (PTTEP) တို့အကြားရှိ ဖက်စပ်ကုမ္ပဏီနှစ်ခုလည်း ပါဝင်နေတယ်လို့ JFM ရဲ့ နိုဝင်ဘာလ ၃ ရက်က ထုတ်ပြန်ချက်မှာ ဖော်ပြထားပါတယ်။
အဆိုပါ ဖက်စပ်ကုမ္ပဏီ ၂ ခုဖြစ်တဲ့ MGTC နဲ့ ATL တို့ဟာ ၂၀၂၁ ခုနှစ်မှ ၂၀၂၄ ခုနှစ်အတွင်း ပိုက်လိုင်းလုပ်ငန်းက ဝင်ငွေပေါင်း အနည်းဆုံး အမေရိကန်ဒေါ်လာ ၁.၀၇၈ ဘီလီယံ ရရှိခဲ့ပြီး ရှယ်ယာအနည်းစုပိုင်ရှင်ဖြစ်တဲ့ MOGE က အမေရိကန်ဒေါ်လာ ၂၃၉ သန်း ရရှိလိမ့်မယ်လို့ JFM ထံမှ သိရပါတယ်။
၂၀၁၈ နဲ့ ၂၀၁၉ ခုနှစ် အာဏာသိမ်းမှု မတိုင်မီကပင် MGTC နဲ့ ATL တို့ဟာ မြန်မာအစိုးရထံ အခွန်နဲ့ အမြတ်ဝေစု အမေရိကန်ဒေါ်လာ ၅၇၀ သန်းကျော် ပေးချေခဲ့တယ်လို့ဆိုပါတယ်။
“စစ်တပ်ရဲ့ တရားမဝင် အာဏာသိမ်းကြိုးပမ်းမှု ငါးနှစ်နီးပါး ရောက်လာတဲ့အချိန်အထိ ဗြိတိသျှပင်လယ်ရပ်ခြားပိုင် နယ်မြေတွေမှာ မြန်မာစစ်အုပ်စုဆက်နွှယ်ကုမ္ပဏီတွေ ဆက်လက်လည်ပတ်နေတာဟာ လက်ခံနိုင်စရာ အကြောင်းမရှိပါဘူး။ ကေမန်ကျွန်းစုများနဲ့ ဘာမြူဒါအာဏာပိုင်တွေဆီကို ဥပဒေရေးရာတိုင်ကြားချက်တွေ တင်သွင်းခဲ့တာ ၁၈ လ ကြာခဲ့ပြီးဖြစ်ပြီး၊ အရေးယူဆောင်ရွက်မှုတွေ ကြန့်ကြာတာကြောင့် အသက်တွေ ဆုံးရှုံးနေရပါတယ်။ အာဏာပိုင်တွေအနေနဲ့ အခုချက်ချင်း အရေးယူဆောင်ရွက်ဖို့ လိုအပ်ပါတယ်” လို့ JFM ပြောရေးဆိုခွင့်ရှိသူ မရတနာမောင်က ပြောပါတယ်။
ကမ်းလွန်လုပ်ကွက်မှ သဘာဝဓါတ်ငွေ့ တင်ပို့တဲ့ ပိုက်လိုင်းကုမ္ပဏီတွေဟာ စစ်အုပ်စုထံ ဘဏ္ဍာငွေ ဆက်လက်စီးဝင်နေမှုမှာ အဓိကအခန်းကဏ္ဍက ပါဝင်ပတ်သက်နေပြီး ယင်းငွေကြေးတွေဟာ စစ်အုပ်စုရဲ့ အာဏာသိမ်းမှုနောက်ပိုင်း အစုလိုက်အပြုံလိုက်သတ်ဖြတ်မှုအပါအဝင် နိုင်ငံတကာရာဇတ်မှုတွေ ကျူးလွန်ရာမှာ အထောက်အပံ့ဖြစ်နေတယ်လို့ သိရပါတယ်။
ကေမန်ကျွန်းစုတွေမှာ မှတ်ပုံတင်ထားတဲ့ Andaman Transportation Limited (ATL) ကုမ္ပဏီဟာ PTTEP Offshore Investment Company Limited (PTTEPO)ရဲ့ ဖက်စပ်လုပ်ငန်းတစ်ခု ဖြစ်တယ်လို့ဆိုပါတယ်၊၊
ဇောတိကစီမံကိန်း (ကမ်းလွန်လုပ်ကွက် M9 နဲ့ M11) မှ သဘာဝဓါတ်ငွေ့တွေကို ထိုင်းနိုင်ငံသို့ ပေးဆောင်ပေးတဲ့ ကုမ္ပဏီဖြစ်ပြီး ATL ကို PTTEPO က ၈၀ ရာခိုင်နှုန်းနဲ့ MOGE က ၂၀ ရာခိုင်နှုန်း ပိုင်ဆိုင်ကြောင်း၊ လက်ရှိ ATL ကုမ္ပဏီမှာ MOGE ဌာန ဒါရိုက်တာ ၂ ဦးက ဘုတ်အဖွဲ့ဝင်ဒါရိုက်တာ ၂ ဦးအဖြစ် ပါဝင်နေတယ်လို့ ဆိုပါတယ်။
နောက်ကုမ္ပဏီတစ်ခုမှာ ဘာမြူဒါမှာ မှတ်ပုံတင်ထားတဲ့ Moattama Gas Transportation Company Limited (MGTC) ဖြစ်ပြီး PTTEPO ရဲ့ နောက်ဖက်စပ်ကုမ္ပဏီတစ်ခုဖြစ်တယ်လို့ JFM က ထုတ်ပြန်ပါတယ်။
MGTC ဟာ ရတနာစီမံကိန်း (ကမ်းလွန်လုပ်ကွက် M5 နဲ့ M6) မှ သဘာဝဓါတ်ငွေ့တွေကို ထိုင်းနိုင်ငံအတွင်းသို့ သယ်ယူပို့ဆောင်တဲ့ ပိုက်လိုင်းကို ကြီးကြပ်လုပ်ကိုင်တဲ့ ကုမ္ပဏီ ဖြစ်ပြီး MGTC ကို PTTEPO က ၆၃ ရာခိုင်နှုန်းနဲ့ MOGE က ၃၇ ရာခိုင်နှုန်း ပိုင်ဆိုင်ကြောင်း၊ MOGE ကိုယ်စားပြု ဒါရိုက်တာနှစ်ဦးလည်း ပါဝင်ကြောင်း သိရပါတယ်။
နောက်ကုမ္ပဏီတစ်ခုမှာ အမေရိကန် ရေနံကုမ္ပဏီကြီး Chevron Corporation ရဲ့ ဘာမြူဒါအခြေစိုက် ကုမ္ပဏီဖြစ်တဲ့ Unocal Myanmar Company Limited ဖြစ်ပြီး လက်ရှိမှာ ၄၁ ရာခိုင်နှုန်းကို Chevron Corporation က ပိုင်ဆိုင်တယ်လို့ သိရပါတယ်။
၂၀၂၄ ခုနှစ်မှာ Chevron Corporation ဟာ မြန်မာနိုင်ငံ မထွက်ခွာမိအချိန် ရတနာစီမံကိန်းနဲ့ ပိုက်လိုင်းကုမ္ပဏီ MGTC မှာ အဓိရင်းနှီးမြှပ်နှံလုပ်ကိုင်သူဖြစ်တယ်လို့ ဆိုပါတယ်။
