ဧရာဝတီတိုင်း၊ ဝါးခယ်မမြို့နယ်၊ ကျုံကပြင်ကျေးရွာအုပ်စုမှ ကမ္ဘာ့ရှားပါးကြောင်းမျိုးစိတ်တစ်မျိုးဖြစ်တဲ့ ကြောင်တံငါမျိုးစိတ်တွေ ကျန်ရှိပြီး ကျက်စားနေထိုင်ကြတာကို အတည်ပြုမှတ်တမ်းတင်နိုင်ခဲ့တယ်လို့ ကျုံကပြင်-တက်ဆိပ် သားငှက်ထိန်းသိမ်းရေးအဖွဲ့- KTCG က ထုတ်ပြန်ပါတယ်။
ရှားပါးကြောင်တံငါမျိုးစိတ် Fishing Cat (Prionailurus viverrinus) ကို ကျုံကပြင်- တက်ဆိပ် ထိန်းသိမ်းရေးဧရိယာအတွင်း ကျန်ရှိနေသေးကြောင်း ကင်မရာထောင်ချောက် မှတ်တမ်းတွေအရ အတည်ပြုနိုင်ခဲ့တယ်လို့ ဒီကနေ့ ဇွန်လ ၁၅ ရက်မှာ ထုတ်ပြန်ပါတယ်။
၂၀၂၃ ခုနှစ်မှာ အဲဒီဧရိယာအတွင်း ကင်မရာများ တပ်ဆင် သုတေသနပြုလုပ်ရာမှာ ကြောင်တံငါ မျိုးစိတ်ကို အတည်ပြု မှတ်တမ်းတင်နိုင်ခဲ့တာဖြစ်ပါတယ်။
အစာရေစာလုံလောက်စွာ ရှာဖွေနိုင်ခြင်းနဲ့ နေထိုင်ကျက်စားနိုင်တဲ့ နေရင်းဒေသတွေ ကျန်ရှိခြင်းတို့ကြောင့် အဲဒီဒေသဟာ ကြောင်တံငါတို့ နေထိုင်ကျက်စားနိုင်ဖို့ ကောင်းမွန်တဲ့ နေရာတစ်ခုအဖြစ် တည်ရှိနေပါတယ်လို့ ကျုံကပြင်-တက်ဆိပ် သားငှက်ထိန်းသိမ်းရေးအဖွဲ့က ထုတ်ပြန်ပါတယ်။
ကျန်ရှိနေတဲ့ ကြောင်တံငါတွေ အကောင်ရေ ဆက်လက်ရှင်သန်ပြီး ပြန်လည်ပွားများလာစေဖို့ ဒေသခံတွေ ကိုယ်တိုင် ကာကွယ် ထိန်းသိမ်းရေးဟာ ကြောင်တံငါမျိုးစိတ်တွေ ဆက်လက်ရှင်သန်နိုင်ရေး အရေးကြီးနေတယ်လို့ သိရပါတယ်။
ကြောင်တံငါတွေကို ဧရာဝတီမြစ်ဝ ကျွန်းပေါ်ဒေသ မိန်းမလှကျွန်းတောရိုင်း တိရစ္ဆာန် ဘေးမဲ့တောမှာ တွေ့ရှိရတဲ့ မှတ်တမ်းများ ရှိခဲ့ပြီး ၂၀၁၉ ခုနှစ်မှာ သားငှက်ထိန်းသိမ်းရေးအဖွဲ့ – WCS ရဲ့ မအူပင်မြို့နယ်အတွင်းက သုတေသနမှတ်တမ်းတွေမှာလည်း တွေ့ရှိခဲ့ရဖူးပါတယ်။
အဲဒီနောက် ကြားကာလတွေမှာ မြန်မာနိုင်ငံမှာ ဒေတာအထောက်အထား အတိအကျ မှတ်တမ်းပြုနိုင်ခြင်း မရှိခဲ့ကြောင်း သိရပါတယ်။
ကျုံကပြင် ထိန်းသိမ်းရေး ဧရိယာအတွင်း ဒေသခံတွေ ပြန်လည်ပြောကြားချက်အရ ကြောင်တံငါးမျိုးစိတ်တွေ ရှိခဲ့တယ်လို့ သတင်းတွေ ရရှိခဲ့သော်လည်း အတိအကျ မှတ်တမ်းပြုနိုင်ခဲ့သာ မရှိခဲ့ပါဘူး။ ကင်မရာထောင်ချောက်တွေနဲ့ စောင့်ကြည်ခဲ့သော်လည်း အကောင်ရေနည်းပါးလွန်းတဲ့အတွက် မှတ်တမ်းမတင်နိုင်ခဲ့ဘဲ ၂၀၂၃ ခုနှစ် ကင်မရာထောင်ချောက်များမှာသာ အတိအကျ မှတ်တမ်းတင်နိုင်ခဲ့သာဖြစ်ပါတယ်။
ကြောင်တံငါမျိုးစိတ်ဟာ ကမ္ဘာ့ကြောင်မျိးစိတ်တွေထဲမှာ ရှားပါးမျိုးစိတ်တစ်ခုဖြစ်နေပြီး နိုင်ငံအသီးသီးက ထိန်းသိမ်းရေးလုပ်ငန်းတွေ အစဉ်တဆက် လုပ်ကိုင်နေလျက်ရှိပါတယ်။ မြန်မာနိုင်ငံက ရှားပါးကြောင်တံငါကိုလည်း ထိန်းသိမ်းရေး သုတေသနလုပ်ကိုင်ဖို့ လိုအပ်နေပြီး ၎င်းကို သုတေသနပြုလုပ်မှုတွေ နည်းပါးနေခဲ့ပါတယ်လို့ သိရပါတယ်။
ကျုံကပြင် – တက်ဆိပ် ထိန်းသိမ်းရေးဧရိယာအတွင်း ရှားပါးဇီဝမျိုးစုံ မျိုးကွဲတွေဖြစ်တဲ့ ကြောင်တံငါမျိုးစိတ်အပါအဝင် ကြိုးကြာခေါင်းနီ၊ စာဝါကျား၊ ကိုင်းစွေ့ စတဲ့ ငှက်မျိုးစိတ်တွေကို တွေ့ရှိရပါတယ်။
ဒါ့အပြင် မြန်မာ့မျိုးရင်း ဆောက်လိပ်၊ စင်းချောလိပ် စတဲ့ လိပ်မျိုးစိတ်တွေ၊ စပါးအုံး၊ စပါးကြီး မြွေမျိုးစိတ်တွေနဲ့ အခြားကြောင်မျိုးစိတ်တွေ ကျန်ရှိနေကြောင်း သုတေသနမှတ်တမ်းတွေ ပြုလုပ်ချက်အရ သိရပါတယ်။
ကျုံကပြင်ကျေးရွာအုပ်စုဟာ ဧရာဝတီတိုင်းဒေသကြီး၊ မြောင်မြခရိုင်၊ ဝါးခယ်မမြို့နယ်မှာ တည်ရှိပြီး ဝါးခယ်မမြို့နယ်ရဲ့ ကျေးရွာအုပ်စုပေါင်း ၁၃၅ရွာမှာ ကျေးရွာပေါင်း ၅ရွာနဲ့ ဖွဲ့စည်းထားတဲ့ အစုအဖွဲ့ကျေးရွာဖြစ်ပါတယ်။ လမ်းပန်းဆက်သွယ်ရေးဟာ ကျုံကပြင်ကျေးရွာမှ ရွှေလောင်း၊ ဝါးခယ်မသို့ ကုန်းလမ်းနဲ့ သွားလာနိုင်ပါတယ်။
