မဲခေါင် – လန်ချန်း ပူးပေါင်းဆောင်ရွက်မှု အထူးရန်ပုံငွေ (၂၀၂၅) အစီအစဉ်အနေနဲ့ ပတ်ဝန်းကျင်ဆိုင်ရာ ပူးပေါင်းဆောင်ရွက်မှု အပါအဝင် စီမံကိန်း ၁၄ ခုအတွက် အမေရိကန်ဒေါ်လာ ၃.၃ သန်းကို စစ်ကော်မရှင်ရဲ့ အစိုးရအဖွဲ့ထံ တရုတ်အစိုးရက ပေးအပ်ပါတယ်။
၂၀၂၅ မဲခေါင်- လန်ချန်း ပူးပေါင်းဆောင်ရွက်မှု သဘောတူညီချက်အရ စိုက်ပျိုးရေးနည်းပညာ၊ သိပ္ပံနဲ့ နည်းပညာ၊ ယဉ်ကျေးမှု ဖလှယ်မှု၊ ပတ်ဝန်းကျင်ဆိုင်ရာ ပူးပေါင်းဆောင်ရွက်မှု၊ သဘာဝဘေး အန္တရာယ်ဆိုင်ရာ စီမံခန့်ခွဲမှု၊ ဥပဒေဆိုင်ရာ ပူးပေါင်းဆောင်ရွက်မှု၊ ကုန်သွယ်ရေးကြောင်း သွားလာမှု စတဲ့ နယ်တွေထဲက စီမံကိန်း ၁၄ ခုကို စစ်ကောင်စီရဲ့ စစ်အစိုးရဝန်ကြီးဌာန ၉ ခုက အကောင်အထည်ဖော်သွားမယ်လို့ ဆိုပါတယ်။
မနေ့ ဩဂုတ်လ ၅ ရက်က နေပြည်တော် Park Royal ဟော်တယ်မှာ စီမံကိန်းတွေအတွက် ရန်ပုံငွေ လွှဲပြောင်းမှု လက်ခံလွှာ သဘောတူညီချက်ကို တရုတ်သံမတ် မစ္စမာကျားနဲ့ စစ်ကော်မရှင် နိုင်ငံခြားရေးဝန်ကြီးဌာနတို့ လက်မှတ်ထိုးခဲ့တယ်လို့ ဆိုပါတယ်။
၂၀၁၇ ခုနှစ်မှ စတင်လို့ တရုတ်နိုင်ငံမှာ မဲခေါင် – လန်ချန်း ပူးပေါင်းဆောင်ရွက်မှုအောက်မှာ မြန်မာကို အမေရိကန်ဒေါ်လာ ၃၈. ၃ သန်း ထောက်ပံ့ပေးအပ်ထားပြီဖြစ်တယ်လို့ စစ်ကောင်စီက သတင်းထုတ်ပြန်ပါတယ်။
မဲခေါင်း- လန်ချန်း ပူးပေါင်းဆောင်ရွက်မှု ရန်ပုံငွေနဲ့ မြန်မာမှာ ၂၀၁၈ ခုနှစ်မှ စတင်လို့ စီမံကိန်းပေါင်း ၁၃၂ ခုကို ရရှိခဲ့ပြီး မဲခေါင်နိုင်ငံတွေအနက် အရေအတွက် အများဆုံး ရရှိထားတယ်လို့ ဆိုပါတယ်။
