အပစ်ရပ်ထားတဲ့ စစ်ကောင်စီတပ်ဟာ ရှမ်းပြည်နယ် မြောက်ပိုင်း ၊ နောင်ချိုမြို့နယ်ထဲက ရှဲဆန်သတ္တုကုမ္ပဏီလုပ်ကွက် ထဲကို ဂျက်ဖိုက်တာနဲ့ ပေါင် ၅၀၀ ဗုံးကြဲချတိုက်ခိုက်ရာမှာ အဲဒီကုမ္ပဏီဟာ တရုတ်ငွေယွမ် ၁ သန်းခွဲကျော် ပျက်စီး ဆုံးရှုံးခဲ့တယ်လို့ တအာင်းတပ် PSLF/ TNLA ရဲ့ သတင်းနဲ့ ပြန်ကြားရေးဌာနက ကြေညာပါတယ်။
တအာင်းပြည်၊ တပ်မဟာ – ၂ နယ်မြေ၊ နောင်ချိုမြို့နယ်ထဲက ရှဲဆန် သတ္တုကုမ္ပဏီကို စစ်ကောင်စီမှ တိုက်ပွဲဖြစ်ပွားခြင်း မရှိဘဲ မေလ ၁၁ ရက်၊ မွန်းလွဲ ၁၂ နာရီခွဲခန့်မှာ ဂျက်ဖိုက်တာနဲ့ ပေါင် ၅၀၀ ဗုံး၊ ၂ လုံး လာရောက်ကြဲချပြီး တိုက်ခိုက်ခဲ့တယ်လို့ မေလ ၂၀ ရက်မှာ သတင်းထုတ်ပြန်ပါတယ်။
အဲဒီတိုက်ခိုက်မှုကြောင့် ကုမ္ပဏီအသုံးပြုနေတဲ့ ဘတ်ဖိုး ၁ စီး၊ သတ္တုထုတ်စက် ၁ လုံး၊ စက်ပစ္စည်းတွေ ထားရှိတဲ့ ဂိုဒေါင် ၁ လုံးနဲ့ အခြားပစ္စည်းတွေ များစွာ ထိမှန်ပျက်စီးခဲ့ပြီး စုစုပေါင်းကာလတန်ဖိုး တရုတ်ငွေ ၁, ၆၈၀, ၀၀၀ ယွမ် ပျက်စီးဆုံးရှုံးတယ်လို့ ဆိုပါတယ်။
ဒေသတွင်းသတင်းဌာနဖြစ်တဲ့ ရွှေဖီးမြေသတင်းဌာကတော့ တရုတ်ကုမ္ပဏီပိုင်ဆိုင်တဲ့ သတ္တုတွင်းကို စစ်ကောင်စီက ပေါင် ၅၀၀ ဗုံး၊ ၂ လုံး ကြဲချတိုက်ခိုက်သွားတယ်လို့ ဆိုပါတယ်။
မေလ ၁၈ ရက် ညနေ ၅ နာရီခွဲခန့်ကလည်း စစ်ကောင်စီဟာ တိုက်ပွဲဖြစ်ပွားခြင်း မရှိဘဲ နောင်ချိုမြို့နယ်၊ ဒိုးပင်ကျေးရွာအုပ်စု၊ ရတနာသင်္ဂီကျေးရွာအနီး ဂျက်ဖိုက်တာနဲ့ ပေါင် ၂၅၀ ဗုံး၊ ၆ လုံး ကြဲချတိုက်ခိုက်တယ်လို့ TNLA က ထုတ်ပြန်ထားပါတယ်။
စစ်ကောင်စီဟာ မေလ ၆ ရက်မှ ၃၁ ရက်ထိ အပစ်ခတ်ရပ်စဲရေးကာလ ထပ်မံတိုးထားပေမယ့် တအာင်းတပ် ထိန်းချုပ်ထားတဲ့ မြို့တွေကို မြေပြင်ထိုးစစ်ဆင်ခြင်း၊ ရည်ရွယ်ချက်ရှိရှိ လက်နက်ကြီးတွေ ပစ်ခတ်ခြင်း၊ ဒရုန်းနဲ့ လေကြောင်းနဲ့ နေ့စဉ်အသုံးပြုတိုက်ခိုက်နေတယ်လို့ ဆိုပါတယ်။
ဒေသခံပြည်သူတွေအနေနဲ့ စစ်ကောင်စီရဲ့ လေကြောင်း၊ ဒရုန်းနဲ့ လက်နက်ကြီး ပစ်ခတ်တိုက်ခိုက်မှုရန်မှ ရှောင်ရှားနိုင်ဖို့ စစ်ရေးသတိအမြဲရှိဖို့ လိုအပ်တယ်လို့ သတိပေးထားပါတယ်။
